திருகோணமலையின் சமூக, கலை, இலக்கிய மற்றும் இன நல்லிணக்கச் செயற்பாடுகளில் நீண்டகாலமாகப் பங்காற்றி வந்த ஓய்வு பெற்ற நீதிமன்றப் பதிவாளரும் சமூகச் செயற்பாட்டாளருமான எம்.எஸ்.எம். நசீர் (M.S.M. Nazeer JP) அவர்கள் காலமானார். அன்னாரின் உடல் இஸ்லாமிய மத முறைப்படி நல்லடக்கம் செய்யப்பட்டது.

திருகோணமலை மூர்வீதியைச் சேர்ந்த நசீர் அவர்கள், இலங்கையின் பல நீதிமன்றங்களில் பதிவாளராகச் சிறப்பாகப் பணியாற்றி ஓய்வு பெற்றதுடன், தனது பணிக்காலத்திலும் ஓய்வுக்குப் பின்னரும் சமூக நலன் சார்ந்த பல்வேறு செயற்பாடுகளில் பங்காற்றி வந்த ஒருவராவார்.

குறிப்பாகத் திருகோணமலையில் தமிழ், முஸ்லிம் மக்களிடையே ஒற்றுமையையும் நல்லிணக்கத்தையும் வளர்ப்பதில் அக்கறை கொண்டிருந்த இவர், இன, மத வேறுபாடுகளைக் கடந்து அனைத்துச் சமூக மக்களுடனும் நெருக்கமான உறவுகளைப் பேணி வந்தவர் என அவரை அறிந்தவர்கள் நினைவுகூருகின்றனர்.

திருகோணமலை தமிழர் பேரவையின் செயற்பாடுகளிலும் பங்காற்றிய நசீர் அவர்கள், தமிழ் மக்களுக்கும் முஸ்லிம் மக்களுக்கும் இடையிலான நல்லுறவுகளைப் பாதுகாப்பதிலும், இரு சமூகங்களும் பரஸ்பர புரிந்துணர்வுடன் ஒற்றுமையாக வாழ வேண்டும் என்ற கருத்தை வலியுறுத்துவதிலும் உறுதியான நிலைப்பாட்டைக் கொண்டிருந்தார்.

திருகோணமலையில் நடைபெற்ற கலை, இலக்கிய, கலாசார மற்றும் சமூக நிகழ்வுகளில் ஆர்வத்துடன் பங்குபற்றிய இவர், பல்வேறு சமூகப் பின்னணிகளைக் கொண்டவர்களுடன் நட்புறவை வளர்த்துக் கொண்டதுடன், அந்த உறவுகளைச் சமூக நல்லிணக்கத்திற்கான பாலமாகவும் பயன்படுத்தி வந்துள்ளார்.

உள்ளூராட்சி நிர்வாகம் தொடர்பான விடயங்களிலும் தனது அனுபவத்தின் அடிப்படையில் ஆலோசனைகளை வழங்கி வந்த நசீர் அவர்கள், நகராட்சி மன்ற உறுப்பினராகப் பணியாற்றிய காலத்தில் தமக்குப் பல்வேறு ஆலோசனைகளை வழங்கியதாக முன்னாள் உறுப்பினர் ஒருவராலும் நினைவுகூரப்பட்டுள்ளார்.

சகல சமூகங்களுடனும் நல்லுறவைப் பேணி, சமூக ஒற்றுமைக்காகச் செயற்பட்டு வந்த நசீர் அவர்களின் மறைவு, அவரது குடும்பத்தினருக்கும் உறவினர்களுக்கும் மாத்திரமன்றி, அவருடன் இணைந்து சமூகப் பணிகளில் ஈடுபட்ட அனைவருக்கும் பெரும் இழப்பாக அமைந்துள்ளது.

குறிப்பாகத் தமிழ், முஸ்லிம் சமூகங்களுக்கிடையிலான நல்லிணக்கத்தை வலுப்படுத்த வேண்டிய இன்றைய சூழலில், இரு சமூகங்களுடனும் நெருக்கமான தொடர்புகளைப் பேணி வந்த நசீர் போன்ற சமூகச் செயற்பாட்டாளர்களின் இழப்பு திருகோணமலையின் பொதுவாழ்வில் குறிப்பிடத்தக்க வெற்றிடத்தை ஏற்படுத்தியுள்ளது.

இன்னா லில்லாஹி வ இன்னா இலைஹி ராஜிஊன்.

எம்.எஸ்.எம். நசீர் அவர்களின் மறைவால் துயருற்றிருக்கும் குடும்பத்தினர், உறவினர்கள், நண்பர்கள் மற்றும் அவருடன் இணைந்து சமூகப் பணிகளில் ஈடுபட்ட அனைவருக்கும் எனது ஆழ்ந்த இரங்கல்களைத் தெரிவித்துக் கொள்கின்றேன்.

எல்லாம் வல்ல அல்லாஹ் அன்னாரின் பாவங்களை மன்னித்து, ஜன்னத்துல் ஃபிர்தவ்ஸில் உயர்ந்த இடத்தை வழங்குவானாக. அன்னாரின் பிரிவால் துயருற்றிருக்கும் குடும்பத்தினருக்கு மனவலிமையையும் பொறுமையையும் வழங்குவானாக.

ஆமீன்.

சுவாமி சங்கரானந்தா 🙏
ஈழ மண்ணின் சுவடுகள் ஆசிரியர்