கல்கரி, 2026ஆம் ஆண்டு அக்டோபர் மாதம் 16ஆம் திகதி

கனடாவின் அல்பெர்ட்டா மாகாணத்தின் எதிர்காலம் தொடர்பான பொதுவாக்கெடுப்பு நெருங்கிவரும் நிலையில், கனடாவுடன் தொடர்ந்து இணைந்திருப்பதற்கு வாக்களிக்குமாறு பிரதமர் மார்க் கார்னி மாகாண மக்களுக்கு வேண்டுகோள் விடுத்துள்ளார். இந்த வாக்கெடுப்பின் விளைவுகள் மிகவும் முக்கியமானவை என்று எச்சரித்துள்ள அவர், பிரிவினைக்கு எதிராக மக்கள் தெளிவான முடிவை வழங்க வேண்டும் என்றும் வலியுறுத்தியுள்ளார்.

அக்டோபர் மாதம் 15ஆம் திகதி வியாழக்கிழமை கல்கரியில் நடைபெற்ற கனடிய ஒற்றுமைக்கு ஆதரவான கூட்டத்தில் உரையாற்றிய கார்னி, உலகம் ஆபத்துகளையும் பிளவுகளையும் எதிர்கொண்டிருக்கும் இந்த நேரத்தில், கனடாவுக்குள் மேலும் பிளவை உருவாக்குவது நாட்டின் எதிர்காலத்தைப் பாதிக்கும் என்று தெரிவித்தார்.

கருத்துக்கணிப்புகள் கனடாவுடன் தொடர்வதற்கே பெரும்பான்மையான ஆதரவு இருப்பதாகக் காட்டினாலும், அதன் அடிப்படையில் முடிவு ஏற்கெனவே தீர்மானிக்கப்பட்டுவிட்டதாக மக்கள் கருதக்கூடாது என்றும் அவர் கேட்டுக்கொண்டார். வாக்காளர்கள் நேரில் சென்று வாக்களிப்பதே இறுதி முடிவைத் தீர்மானிக்கும் என்பதையும் அவர் வலியுறுத்தினார்.

அல்பெர்ட்டாவில் அக்டோபர் மாதம் 19ஆம் திகதி திங்கட்கிழமை நடைபெறவுள்ள இந்த வாக்கெடுப்பு, மாகாணத்தை உடனடியாகக் கனடாவிலிருந்து பிரிப்பதற்கான நேரடி வாக்கெடுப்பு அல்ல. அல்பெர்ட்டா கனடாவின் ஒரு மாகாணமாகத் தொடர வேண்டுமா, அல்லது எதிர்காலத்தில் பிரிவினை தொடர்பாகச் சட்டப்பூர்வமாகக் கட்டுப்படுத்தும் மற்றொரு வாக்கெடுப்பை நடத்துவதற்குத் தேவையான சட்ட நடவடிக்கைகளை மாகாண அரசு தொடங்க வேண்டுமா என்பதே மக்களிடம் கேட்கப்படுகிறது.

வாக்காளர்களுக்கு வழங்கப்படும் பத்தாவது கேள்வியில் இரண்டு தெரிவுகள் இடம்பெறுகின்றன. முதலாவது, அல்பெர்ட்டா கனடாவின் மாகாணமாகத் தொடர வேண்டும் என்பதாகும். இரண்டாவது, அல்பெர்ட்டா கனடாவிலிருந்து பிரிய வேண்டுமா என்பது குறித்து எதிர்காலத்தில் சட்டப்பூர்வமாகக் கட்டுப்படுத்தும் மாகாண வாக்கெடுப்பை நடத்துவதற்காக, கனடிய அரசியலமைப்பின்கீழ் தேவையான சட்ட நடவடிக்கைகளை அரசு தொடங்க வேண்டும் என்பதாகும்.

இந்தக் கேள்விக்கான தற்போதைய வாக்கெடுப்பின் முடிவு சட்டப்பூர்வமாகக் கட்டுப்படுத்தாதது என்று அல்பெர்ட்டா தேர்தல் அமைப்பு தெளிவுபடுத்தியுள்ளது. எனவே இரண்டாவது தெரிவுக்குப் பெரும்பான்மை ஆதரவு கிடைத்தாலும், அதுவே அல்பெர்ட்டா தனிநாடாகிவிட்டது என்று பொருள்படாது. அடுத்தகட்ட சட்ட மற்றும் அரசியலமைப்பு நடவடிக்கைகளைத் தொடங்குவதற்கான மக்களின் விருப்பமாகவே அது அமையும்.

எண்ணெய் மற்றும் எரிவாயு வளங்களைக் கொண்ட அல்பெர்ட்டாவில், மத்திய அரசுடனான அதிகாரப் பகிர்வு மற்றும் எரிசக்திக் கொள்கைகள் நீண்டகால அரசியல் விவாதங்களாக இருந்து வருகின்றன. மாகாணத்தின் வளங்கள் கனடாவின் பொருளாதாரத்திற்குப் பெரும் பங்களிப்பை வழங்கினாலும், ஒட்டாவாவின் கொள்கைகள் அல்பெர்ட்டாவின் வளர்ச்சியைக் கட்டுப்படுத்துவதாகப் பிரிவினை ஆதரவாளர்கள் குற்றஞ்சாட்டுகின்றனர்.

சுற்றுச்சூழல் கட்டுப்பாடுகளுக்கு மத்திய அரசு அளிக்கும் முன்னுரிமை, எண்ணெய் மற்றும் எரிவாயுத் துறையின் விரிவாக்கத்திற்குத் தடையாக இருப்பதாகவும் அவர்கள் வாதிடுகின்றனர். கனடாவிலிருந்து பிரிந்தால் மாகாணத்தின் வளங்கள் மற்றும் வருவாய் மீதான கட்டுப்பாட்டை அதிகரிக்க முடியும் என்பது அவர்களது நிலைப்பாடாகும்.

மறுபுறம், பிரிவினை முயற்சி நீண்டகாலப் பொருளாதார நிச்சயமின்மையை ஏற்படுத்தக்கூடும் என்று எதிர்ப்பாளர்கள் எச்சரிக்கின்றனர். கடன் பகிர்வு, முதலீடுகளின் எதிர்காலம் மற்றும் வேலைவாய்ப்புகள் தொடர்பாக எழக்கூடிய சிக்கல்களையும் அவர்கள் முன்வைக்கின்றனர். இவை பிரிவினை ஏற்பட்டால் எதிர்கொள்ளக்கூடிய ஆபத்துகள் குறித்த அவர்களது வாதங்களாகும்.

அல்பெர்ட்டா மக்களிடையே நிலவும் அதிருப்திகள் உண்மையானவை என்பதைத் தனது உரையில் ஏற்றுக்கொண்ட கார்னி, மாகாணத்திற்கும் அதன் எரிசக்தித் துறைக்கும் ஆதரவளிக்கத் தனது அரசு தயாராக இருப்பதாகத் தெரிவித்தார். அல்பெர்ட்டாவிலிருந்து கனடாவின் பசிபிக் கடற்கரைக்கு புதிய எண்ணெய்க் குழாய்த் திட்டத்தின் அனுமதி நடவடிக்கைகளை விரைவுபடுத்தும் முயற்சியையும் அவர் முன்னிறுத்தியுள்ளார்.

அமெரிக்க அதிபர் டொனால்ட் ட்ரம்பின் வர்த்தக நடவடிக்கைகளால் கனடா எதிர்கொள்ளும் அழுத்தங்களுக்கு மத்தியில், ஏற்றுமதிச் சந்தைகளை விரிவுபடுத்துவதும் நாட்டின் பொருளாதார வலிமையை அதிகரிப்பதும் அவசியம் என்ற நிலைப்பாட்டை கார்னி வலியுறுத்தி வருகின்றார்.

இந்த வாக்கெடுப்பை அறிவித்த அல்பெர்ட்டா முதல்வர் டேனியல் ஸ்மித், மாகாணம் கனடாவுடன் தொடர்வதையே ஆதரிக்கிறார். ஒன்றுபட்ட கனடாவுக்குள் வலிமையான அல்பெர்ட்டாவை உருவாக்குவதே தனது அரசினதும் ஐக்கிய கன்சர்வேட்டிவ் கட்சியின் சட்டமன்ற உறுப்பினர்களினதும் நிலைப்பாடு என்று அவர் அறிவித்துள்ளார். மாகாண உரிமைகளைப் பாதுகாப்பதற்கான முயற்சிகள் தொடர வேண்டும் என்றாலும், அதற்குப் பிரிவினையே தீர்வு என்பது தனது நிலைப்பாடு அல்ல என்பதை அவர் தெளிவுபடுத்தியுள்ளார்.

பிரிவினை விவாதத்தில் முதற்குடி மக்களின் ஒப்பந்த உரிமைகளும் முக்கிய இடத்தைப் பெறுகின்றன. அவர்களின் உரிமைகளில் ஏற்படக்கூடிய தாக்கங்கள் குறித்து ஆலோசனை நடத்தப்பட வேண்டிய அவசியம் தொடர்பாக நீதிமன்றத் தீர்ப்பு வழங்கப்பட்டுள்ளதாக அல்பெர்ட்டா அரசு தெரிவித்துள்ளது. அந்தத் தீர்ப்புக்கு எதிராக மேல்முறையீடு செய்வதாகக் கூறியுள்ள மாகாண அரசு, தற்போதைய வாக்கெடுப்பு நேரடியாகப் பிரிவினையை ஏற்படுத்தாது என்றும் விளக்கமளித்துள்ளது.

அக்டோபர் 19ஆம் திகதி நடைபெறும் பொதுவாக்கெடுப்பில் மொத்தம் பத்து கேள்விகள் இடம்பெறுகின்றன. பிரிவினை தொடர்பான கேள்வியுடன், குடியேற்றம், மாகாண அரசின் சேவைகளுக்கான தகுதி, வாக்காளர் குடியுரிமைச் சான்று மற்றும் மத்திய–மாகாண அதிகாரப் பகிர்வு உள்ளிட்ட விவகாரங்களிலும் மக்கள் கருத்துக் கேட்கப்படுகிறது.

முன்கூட்டிய வாக்களிப்பு அக்டோபர் மாதம் 13ஆம் திகதி தொடங்கியுள்ள நிலையில், அது அக்டோபர் 17ஆம் திகதி சனிக்கிழமை வரை நடைபெறுகிறது. பிரதான வாக்களிப்பு நாளான அக்டோபர் 19ஆம் திகதி, அல்பெர்ட்டா உள்ளூர் நேரப்படி காலை 9 மணி முதல் இரவு 8 மணி வரை வாக்குச் சாவடிகள் திறந்திருக்கும்.

கனடியக் குடியுரிமை கொண்டவராகவும், வாக்களிப்பு நாளில் குறைந்தது 18 வயது நிறைவடைந்தவராகவும், அல்பெர்ட்டாவில் வழமையாக வசிப்பவராகவும் இருப்பவர்கள் வாக்களிக்கத் தகுதியுடையவர்கள் என்று தேர்தல் அமைப்பு தெரிவித்துள்ளது.

வாக்குச் சீட்டுகள் கைகளால் எண்ணப்படவுள்ளன. பிரிவினை தொடர்பான பத்தாவது கேள்விக்கான வாக்குகள் முதலில் எண்ணப்படும். அதிகாரப்பூர்வமற்ற வாக்கு எண்ணிக்கை, வாக்களிப்பு நிறைவடைந்ததிலிருந்து 48 மணித்தியாலங்களுக்குள் முடிக்கப்பட வேண்டும். சரிபார்ப்புப் பணிகளுக்குப் பின்னர் அதிகாரப்பூர்வ முடிவுகள் அக்டோபர் மாதம் 29ஆம் திகதி காலை 10 மணிக்கு அறிவிக்கப்படவுள்ளன.