அருள்மிகு அன்னை சிவகாமசுந்தரியின் திருவருளைப் போற்றும் நூறு பாடல்கள்

ஆக்கியோன்: சுவாமி சங்கரானந்தா 🙏

கணபதி காப்பு

சந்தன நிறமும் குஞ்சர முகமும்
ஐந்து கரத்தோன் அங்குச பாசமும்
கையில் கொண்டு வந்து என் முன்னே
சிவகாமி யந்தாதி சிறக்க வருள் தருக கணபதியே.

நூல்

1.
பரமசிவன் நாயகியை பரந்தாமன் தங்கையை
கந்தக்கடவுளுக்கும் கணபதிக்கும் தாயை
அன்னை சிவகாமியை எண்ணித் தொழுதிடவே
மண்ணில் பாவமெல்லாம் போயகலத் துதியிதுவே.

2.
துதிக்கின்ற போதும் நெஞ்சில் பதிக்கின்ற போதும்
துடிக்கின்ற இதயத்து நினைவில் எல்லாம்
மதிக்கின்ற தாய் வந்தமர்ந்து படிக்கின்ற பாவிதனை
செபிக்கின்ற யாவர்க்கும் செகத்தினிலே அருள்தரவே.

3.
அருளும் பொருளும் அகலாச் செல்வமும்
அளிக்கின்ற தேவி சிவகாமியை நினைக்கின்ற நொடியில்
அழியும் பிணியும் நோய்கள் எல்லாம்
வதிக்கின்ற வாழ்வுமினி மேவும் வையகத்தே.

4.
வையகத்தே நாளும் வாடும் மனிதர் எல்லாம்
மெய்யகத்தே சிவகாமியை போற்றி வணங்கிடவே
நெஞ்சகத்தே அன்பும் கருணையும் தானாய் மேவ
கையகத்தே பொருளும் செல்வமும் கூடி மலர்ந்திடவே.

5.
மலர்ந்திட நினைவினில் நான் மறை நாயகி
கலந்திட சிவனுடன் வான் வரை ஏகியே
புலர்ந்திட வாழ்வினில் எண்ணிட அருள் தர
வளர்ந்திட நாளுமே பணிந்தேன் சிவையே.

6.
சிவையே உமையே வந்தருள் தந்து
இமை போல் என் விழி காத்திட நின்று
அவை முன் என் சொல் எடுபட அருள
சுவையாய் வாழ்வது வையகம் தன்னில்.

7.
தன்னில் பிரியா சிவத்துடன் ஒன்றி
என்னில் பிரியா அன்பினைக் கொண்டு
கண்ணில் தெரியா துன்பங்கள் போக்கி
மண்ணில் துணையாய் இருக்கும் தாயே.

8.
தாயாய் எனக்கு தரணியில் அருளி
மாயப் பிறவியின் மயக்கம் அறுத்து
தூய மெய்பொருள் ஞானம் முரைத்து
ஒயாதென் சிந்தையில் மேவிடும் நிரந்தரியே.

9.
நிரந்தரி சுந்தரி செளந்தரி துறந்தறியாள்
அந்தரி பரம்பரி ப்ரணவ ரூபிணி அரவணைப்பாள்
சங்கரி சாம்பவி துணையென எண்ணிட அருள்பவளே
வெந்துயர் போக்கிட தோன்றிடு தாயே ஈஸ்வரியே.

10.
ஈஸ்வரி வாஹினி ஈசனின் பத்தினி உத்தமியே
வாசனின் தங்கை வளமருள் மங்கை அம்பிகையே
போற்றிட உன்னை ஏற்றிடும் தாயே சுமங்கலியே
ஊற்றெழும் அருளால் வரமெனத் தருவாய் அடைக்கலமே.

11.
அடைக்கலமாகவே உன் பாதக் கமலத்துள்
படைக்கலம் கொண்டு துயர் துடைக்கும் தேவியே
தடைக் களம் இல்லா வாழ்வினை அருள்க வையத்துள்
விடையுடன் மேவும் சிவனின் பாதியே தாயே சிவகாமியே.

12.
சிவகாமியே அபிராமியே ஆறா வடுக்களையும் ஆற்றும் அன்னையே
மாறாது உள்ளத்துள் நிலைத்து அமுதீசர் பாகம் அகலாத் தேவியே
ஈரேழு உலகத்தையும் காக்கும் ஆதிபராசக்தியே
திறனே ஆற்றலே அகிலத்தின் வலிமையே தாயேயுந்தன் திரு வண்ணமே.

13.
வண்ணமே மலரே கார் கூந்தலுடை அழகியே அம்மையே
வார்சடையான் தேவியே கங்கைக் இளையவளே பூவே புனிதையே
மகிஷனை வதைத்து இவ் அகிலத்தை காத்த அரசியே மூவிழியாளே
முதிராத் திங்களொடு சுடரும் தாயே இனி நீயே எந்தன் வழித் துணையே.

14.
துணையாய் எனையும் காத்திடும் நிலையானவோர் இறையாய்
கரும்பு வில்லும் அங்குச பாசமும் கைகளில் ஏந்தி
அரும்பும் துன்பம் துடைத்து அழிக்கும் அன்னையே
சிலம்பினை அணிந்து சிங்கமீதேறி வந்தெனை அரவணைத்திடவே.

15.
அரவணைத் தெனையே ஆனந்த நாயகி
வர மளித்திடவே வல்லபி வாழ்வினில்
தரவனைத்துமே எனக்கு நலங்கள் யாவையும்
பலனனைத்துமே சமர்ப்பணமாயுன் பாதத் திருவடியே.

16.
திருவடியும் திருக்கையும் திருமுகத் தழகும்
ஒரு முகமாய் மிளிரும் செம் பொற்சுடரே செல்வியே சிவகாமியே
இருவரில் தோன்றி உருமர பெய்தி ஒன்றாய் ஒன்றிய சிவசக்தியே
திருவருள் தருக முன் வந்து நினைத்தவை யாவும் சித்திக்கவே.

17.
சித்திக்கும் சக்திக்கும் புத்திக்கும் அம்மே உன்மேல் கொண்ட பக்திக்கும்
அருளுமந்த நடராசனின் நாயகியே ஆனந்தப் பொற்கொடியே அன்னை சிவகாமியே
சீராய் என்னை வாழ்வித்தருள நித்தம் வரம் நல்கும் திரிபுர சுந்தரியே
தீதாய் ஏவல் பில்லி சூனியம் வைத்தவரின் நெஞ்சம் பிளந்தவர் குடி அறுத்திடவே.

18.
அறுத்திட வினையும் கேடும் பகையும் அல்லல் எல்லாம் அழித்திடும் அன்னையே சிவகாமியே
பொறுத்திடவே உன் மைந்தன் அறிந்தும் அறியாமல் செய்த தவறை எல்லாம்
வெறுத்திடா தென்னை அறுதியிட்டு காக்கும் என் உறுதியே வெங்கடவன் தங்கையே
தரித்திரப் பாவம் எல்லாம் எரித்து என் வினை மாற்றும் ஆற்றலே அழகே உன்னை சென்னியே செப்பினேனே.

19.
செப்பிய முப்புர சுந்தரி நாவினில் நயந்தது நயம் பெறவே
கப்பிய கணபதி தோன்றிட வழி சமை அம்பிகை சரணென வாகிடவே
சுப்பிரமணியனின் தாயவள் தாயென வந்தருள் தந்திடவே
அப்புறம் இப்புறம் எப்புறம் ஆகினும் வாழ்வது ஜெயித்திடுமே.

20.
ஜெயித்திட செபித்திட அருளிடும் அன்னையே சபித்திடுவார் தமை சரித்திட அருள் தர
சரித்திரம் காணவே தரணியில் செயலெழ சிங்கத்தின் மீதமர் தாயே சரணென
பவித்திரம் மிக்கவை தந்தருள் தரவே விசித்திரமாகவே தோன்றிடும் அன்னையே
மிகத்திறன் கொண்டெனை ஆக்கியே செயல் தரும் பாக்கியவதியினை போற்றினேன் பாரிலே.

21.
பாரிலும் பரந்த வானிலும் சிவமேகி உறைந்து
சீரிலே மிகுந்து சீதளச் செந்தாமரை தனிலமர்ந்து
பூதலத் துயிர்க் கெல்லாம் அருளும் அன்னையை
புவனத்தே பணிந்து தொழுவார்க்கு என்றும் வாரதிடர்.

22.
இடர்வர தளறிடா மனமளித் தருளவே
ஈர்ஞ்சடை அந்தணன் நாயகி போற்றிட
மாசிலா அன்னையின் அருளெனக் கேகியே
ஈன்றிடத் தாயினி இச்செகம் இல்லையே.

23.
இல்லையே என்ற சொல்லையே தந்திடா அன்னையை
தொல்லையே இல்லா வாழ்வினை அருளும் மென்மையை
பிள்ளைகள் இரண்டை செல்வமாய் அளித்த செல்வியை
சிவகாமி அன்னையை போற்றிட வையத்துள் ஆனந்தமே.

24.
ஆனந்தமாய் அழகாய் உள்ளத்தில் அமரும் அற்புத தாயவளே
ஆரம்பமாய் முடிவாய் முதலாய் புவனத்தின் மூத்தவளாய்
ஈரெழ் உலகையும் முன்நின்று காக்கும் பேராற்றலாய்
ஈசனுக்கு துணையாள் உனை அன்றி இணையாய் தெய்வம் வணங்கிடவோ.

25.
வணங்கிட இடர்கலை சுந்தரி பணிந்திட துயரது விலடவே
சந்திர சூரிய இந்திரத் தேவரும் வளர்ந்திட அருளிய சுந்தரியே
சுந்தரவானவன் தில்லையில் வாழ்பவன் சிவனுடன் உறைபவள் தாயே உனைத் தானே
மந்திரம் ஜந்திரம் கொண்டுனை பூசைகள் செய்திட வந்து உடன் தோன்றிடவே.

26.
தோன்றிடவே சிவகாமி திருவுருவம் என் அகத்தே
தொலைந்திடும் வினையிருள் துளிர்த்திடும் ஞானம் மனத்தே
வானவர்கள் போற்றிடும் தில்லைப் பொன்னம்பலத் தாயே
வாழ்வின் முதலும் முடிவுமாய் நிற்கும் திருவடியே.

27.
திருவடியே துணையெனத் தினந்தோறும் பணிந்திடுவேன்
திருவருளே செல்வமெனச் சிந்தையில் அணிந்திடுவேன்
மருவிய மாயையினால் மனமயங்கி நின்றிடாமல்
மறையினில் விளங்கிடும் மங்கலமான பேரொளியே.

28.
ஒளியே உமையே உயிர்க்கெல்லாம் ஆதாரமானவளே
உணர்வினுள் உணர்வாக உறைந்திடும் பராசக்தியே
அளவிலா ஆசையினால் அலைகின்ற என் மனத்தை
அறிவினில் நிலைபெற அருள்செய்யும் நல்வழியே.

29.
வழியே அறியாமல் வையத்தில் அலைந்திடும் போது
வழிகாட்டும் அன்னையாக வந்தென்னை அணைத்தவளே
பழிவினை மறந்திடப் பண்பினை வளர்த்திடும் தாயே
பாசத்தை அறுத்திடும் பாதத் தாமரை மலரே.

30.
மலரே மணமே மங்கலமான சிவகாமியே
மறைகளின் பொருளாக மனத்தினில் விளங்குபவளே
நிலையற்ற வாழ்வினிலே நிலையான துணையாய்
நிறைந்திடும் பேரின்ப நித்தியமான நிலையே.

31.
நிலையே சிவமே நித்தியமான பரம்பொருளே
நினைப்பவர் உள்ளத்தில் நிறைந்திடும் அருளுருவே
அலையென எழுகின்ற ஆசைகள் அடங்கிடவே
அகத்தினில் இனித்திடும் ஆனந்தத் திருவமுதமே.

32.
அமுதமே அருளே அழிவற்ற ஆனந்தமே
அன்பெனும் ஆலயத்தில் அமர்ந்திடும் அம்பிகையே
சமயத்தின் நெறியினிலே சத்தியம் உணர்த்திடும்
சகலமும் நீயெனச் சொல்லிடும் என்னுயிரே.

33.
உயிரே உயிர்க்குயிரே உலகமெல்லாம் நிறைந்தவளே
உயர்ந்தவர் தாழ்ந்தவர் என்ற பேதம் கடந்தவளே
பயிருக்கு மழைபோலப் பக்தர்க்கு அருள் பொழியும்
பராசக்தி சிவகாமி பரம்பொருளின் சிவமே.

34.
சிவமே சிவமே சிவகாமி தேவியின் வடிவமே
சிந்தையில் நீங்காத செம்மையான சத்தியமே
தவமே புரியாத தாழ்மையுள்ள அடியேனுக்கும்
தாயாக வந்தருளும் தணியாத திருநினைவே.

35.
நினைவே நித்தமும் நிலைத்திடும் அன்னையின் நினைவே
நெஞ்சத்தின் இருளினை நீக்கிடும் அருட்கதிரே
வினையால் விளைகின்ற வேதனை சூழ்ந்திடும் போது
விழிகளில் நீராக வழிந்திடும் தாயின் துணையே.

36.
துணையே சிவகாமி துயர்துடைக்கும் திருவருளே
தூய்மையின் வடிவாகத் துலங்கிடும் அம்பிகையே
பிணியே பசியே பிறர்துயர் கண்டிடும் போது
பெருமையாய் உதவிடச் செய்திடும் பேரறமே.

37.
அறமே சிவத்தின் அழியாத அருட்செல்வமே
அன்போடு பிறர்க்குதவும் ஆற்றலின் பிறப்பிடமே
பிறர்துயர் தன்துயராய்ப் பேணிடும் உள்ளம் தந்து
பேருலகைக் காத்திடும் பெருந்தாயின் கருணையே.

38.
கருணையே கடவுளின் கண்ணாக விளங்குபவளே
கலங்கிய மனங்களை கனிவுடன் அணைப்பவளே
ஒருகணமும் உன்னருளை உணராமல் வாழ்ந்திடாத
உயிர்களுக்கு ஆதாரமான உன்னத அருட்கடலே.

39.
கடலே கரையற்ற கனிவுடைய கருணைக்கடலே
கண்ணீரின் பொருளறிந்து காத்திடும் சிவகாமியே
உடலோடு உயிர்வாழும் உண்மையை உணர்த்திடும்
உள்ளத்தின் ஆழத்தில் ஒளிர்ந்திடும் ஞானமுத்தே.

40.
முத்தே முழுமுதலே மூவுலகின் நாயகியே
முத்திக்கு வழிகாட்டும் மெய்ப்பொருளின் தேவதையே
பத்தோடு பாசமும் பிணைத்திடும் மாயையை நீக்கி
பரசிவத்தை உணர்ந்திடப் பகர்ந்தருளும் நன்னெறியே.

41.
நெறியே சிவநெறியே நித்தியமான அறநெறியே
நிலைத்திடும் சைவத்தின் நெஞ்சமெனும் சிவசக்தியே
குறையோடு வந்தாலும் குழந்தையென ஏற்றருளும்
குலமெல்லாம் காத்திடும் குணக்குன்றே அன்னையே.

42.
அன்னையே அருள்மழையே அகிலத்தின் உயிர்த்துணையே
அறியாமை இருளகற்றும் அற்புதமான திருவிளக்கே
பசியோடு வருவோர்க்குப் பரிவோடு உணவளிக்கும்
பண்பினை வளர்த்தருளும் பாருலகின் காவலே.

43.
காவலே கருணையே கயிலாய நாயகியே
கண்ணீரைத் துடைத்திடும் கற்பகத்தின் கொழுந்தே
ஆவலாய் உன் திருவடியை அடைகின்ற அடியார்க்கு
அகத்தினில் எழுந்திடும் அழிவில்லாத அருட்சுடரே.

44.
சுடரே சுடர்மணியே சுருதிகளின் உட்பொருளே
சுழல்கின்ற பிறவியிலே சுகமளிக்கும் சிவசக்தியே
பதிபசு பாசமெனும் முப்பொருளின் தன்மையினை
பக்குவமாய் உணர்த்திடும் பரஞானத் தெளிவே.

45.
தெளிவே சிவஞானத் திருவுருவாய் விளங்குபவளே
தேவர்க்கும் முனிவர்க்கும் தேடரிய பொருளானவளே
உளமெலாம் நிறைந்திருந்தும் உருவமொன்றில் அடங்காத
உயிர்கள் உய்ந்திடவே உதித்திடும் மெய்ப்பொருளே.

46.
பொருளே பொருளறிவே பொன்னம்பலத் தாயவளே
பொய்யான ஆசையினால் புலன்வழியே அலைந்திடாமல்
இருளான கோபத்தை இனிய அன்பால் வென்றிடவே
இவ்வுலகில் எனக்களிப்பாய் ஈடில்லாப் பொறுமையே.

47.
பொறுமையே பூமியின் பெருமையென உணர்த்தியவளே
பொறாமையும் பகைமையும் பொடியாக்கும் தேவியளே
அறமுடன் வாழ்கின்ற அடியவரின் நாவினிலே
அழியாமல் நிலைத்திடும் அம்பிகையின் திருப்புகழே.

48.
புகழே புவனங்கள் போற்றுகின்ற பொற்கொடியே
பொன்னம்பலத்தில் ஆடும் புனிதனுடன் நிற்பவளே
நகையால் இருளகற்றும் நற்கருணை நாயகியே
நானிலம் வணங்கிடும் நற்றமிழின் பேரழகே.

49.
அழகே அருளழகே அம்பலத்தின் சிவகாமியே
அடியார்கள் பாடுகின்ற அருந்தமிழின் உயிர்ப்பொருளே
பழந்தமிழ்த் திருமுறைகள் பகர்கின்ற சிவநெறியில்
பரவசமாய் ஒலிக்கின்ற பரமனருள் இன்னிசையே.

50.
இசையே இனிய தமிழே இறைவனது திருப்புகழே
இமையவர்கள் வணங்குகின்ற இறைவியின் சிலம்பொலியே
அசைவிலா பரம்பொருளின் அருட்சக்தி வெளிப்படவே
அம்பலத்தில் நிகழ்கின்ற ஆனந்தத் திருநடனமே.

51.
நடனமே நாதமென நான்மறைகள் போற்றிடவே
நடராசன் திருவடியில் நாயகியாய் நின்றவளே
படைத்தலும் காத்தலும் மறைத்தலும் அருளுதலும்
பரமனுடன் இயற்றுகின்ற பேரின்ப ஆனந்தமே.

52.
ஆனந்தமே அமுதமே அகிலத்தின் தாயவளே
அறிந்தவர் அறியாதோர் அனைவர்க்கும் அருள்பவளே
ஈனமெனப் பிறர் துயரை எண்ணாமல் கடந்திடாத
இயல்பினை எனக்களிக்கும் இணையில்லாப் பேரன்பே.

53.
அன்பே சிவமென்று அறிந்திடும் அடியார்க்கு
அருளாகி அகத்தினிலே அமர்ந்திடும் சிவகாமியே
துன்பத்தில் துவள்கின்ற உயிர்களை அணைத்திடவே
துணிவுடன் அருள்புரியும் தூய்மையான சாந்தமே.

54.
சாந்தமே சமநிலையே சத்தியத்தின் திருவுருவே
சாதியும் பேதமும் கடந்திடும் சக்திநிலையே
ஏந்திய கரங்களினால் எளியோரை உயர்த்திடவே
என்றென்றும் துணைநிற்கும் இணையற்ற நன்மையே.

55.
நன்மையே நல்வினையே நானிலத்தின் தாயவளே
நாள்தோறும் உன்னை எண்ணி நற்றவங்கள் புரிந்திடுவேன்
தன்மையால் பிறர்க்குதவும் தகுதியினை வளர்த்திடவே
தத்துவங்கள் உணர்த்திடும் தன்னிகரில்லா ஞானமே.

56.
ஞானமே சிவஞானம் நல்குகின்ற நாயகியே
நானறியாப் பொருளையெல்லாம் நயமாக உணர்த்துபவளே
ஆணவத்தின் ஆழிருளை அருளொளியால் அகற்றிடவே
அகத்திலே எழுந்தருளும் அம்பிகையே என் குருவே.

57.
குருவே குலதெய்வமே குறையகற்றும் கோமளமே
குறியில்லாப் பரம்பொருளைக் குறிப்பாலே உணர்த்துபவளே
திருவைந்தெழுத்து நமசிவாய சிந்தையிலே நிலைத்திடவே
தீவினையைத் தீர்த்தருளும் செம்மையான திருமந்திரமே.

58.
மந்திரமே மறைப்பொருளே மங்கலத்தின் முதலெழுத்தே
மனமுருகச் செபிப்பவர்க்கு மாசகற்றும் சிவசக்தியே
சந்திரனைச் சடையணிந்த சங்கரனின் இடப்பாகம்
சத்தியமாய் விளங்குகின்ற சற்குருவின் மெய்யே.

59.
மெய்யே மெய்ப்பொருளே மெய்ஞ்ஞான ஒளிவிளக்கே
மெய்யடியார் உள்ளத்தில் மெல்லமர்ந்த மங்கலமே
பொய்யான வாழ்வினிலே புலம்புகின்ற உயிர்களுக்குப்
புதுநம்பிக்கை அளித்திடும் புண்ணியத்தின் விடியலே.

60.
விடியலே விண்ணொளியே வினையகற்றும் சிவகாமியே
விழிப்போடு வாழ்கின்ற வித்தகரின் அருட்செல்வமே
அடியவர் மனமகிழ அறவாழ்வு சிறந்திடவே
அன்னையே நீ வழங்கும் அழியாத நல்வளமே.

61.
வளமே வளமருளும் வள்ளலே சிவகாமியே
வறியோர்க்குப் பகிர்ந்தளிக்கும் மனத்தினைத் தந்தவளே
அளவில்லாச் செல்வத்திலும் அறச்செல்வம் உயர்ந்ததென
அறிவினில் உணர்த்துகின்ற அருட்பெருஞ் செல்வவாழ்வே.

62.
வாழ்வே வையகத்தின் வாழ்வினுக்கு வாழ்வானவளே
வாடுகின்ற மலர்களுக்கும் வசந்தமென வந்தவளே
தாழ்வென்றும் உயர்வென்றும் தரணியில் பிரித்திடாமல்
தாயன்பால் அனைவரையும் தழுவுகின்ற திருவிருப்பே.

63.
விருப்பே உனைக்காண விழைகின்ற என் உள்ளமே
வினையறுத்து உன்னருளில் வீடுபெறத் துடிக்கின்றதே
பிறப்பென்னும் கடலினிலே பிணைப்புகளை நீக்கிடவே
பெருமானின் திருவருளால் பெறுகின்ற அரும்பேறே.

64.
பேறே பிறப்பறுக்கும் பேரின்பத்தின் பெரும்பேறே
பேதமற்ற சிவநெறியின் பெருமையினை உணர்த்துபவளே
மாறாத் திருவருளால் மனக்கவலை நீங்கிடவே
மலர்மீது மலர்ந்திருக்கும் மங்கலத் திருப்பாதமே.

65.
பாதமே பாவமெல்லாம் போக்குகின்ற பொற்பாதமே
பணிந்திடும் அடியவர்க்குப் பரிவளிக்கும் தாமரையே
சீதமிகு தென்றலெனச் சிந்தையினில் புகுந்தருளி
சிறுபிள்ளை எனை அணைக்கும் சிவகாமித் திருத்தாயே.

66.
தாயே தயாபரியே தரணியின் அருட்கொடியே
தவறிழைக்கும் அடியவரைத் தள்ளாமல் ஏற்றவளே
நோயும் நொடியும் நெருங்கிடும் நிலையினிலும்
நொந்துயிர்க்கு நலமளிக்கும் நித்தியமான திருத்தவமே.

67.
தவமே தவப்பயனே தனித்திருக்குந் துணைப்பொருளே
தரணியில் எங்கிருந்தும் தாள்பணிவோர் தாயவளே
சிவமே சிவசக்தி எனச் சிந்தித்து வாழ்ந்திடவே
சீரான வாழ்வளிக்கும் சிவகாமி அடைக்கலமே.

68.
அடைக்கலமே அம்பிகையே அன்பர்தம் உயிர்நிலையே
அகிலத்தில் அனைத்துயிரும் அஞ்சாமல் வாழ்ந்திடவே
தடைக்கற்கள் பலவந்தும் தளராத உள்ளம் தந்து
தாயாகி நின்றிடுவாய் தண்ணளியின் திருவருளே.

69.
அருளே அருட்சக்தியே ஆனந்தப் பெருந்தாயே
அறிவொளியை அளித்தென்னை அறநெறியில் செலுத்துபவளே
இருள்சூழ்ந்த மனதினிலே ஈசனை உணர்ந்திடவே
இயலாததும் இயலச்செய்யும் இறைவியின் பேராற்றலே.

70.
ஆற்றலே ஆதிசக்தி அண்டமெலாம் நிறைந்தவளே
அழிவற்ற சிவத்துடனே அன்புருவாய் இணைந்தவளே
தேற்றமற்ற மனதினுக்குத் தெளிந்துணரும் ஞானம் தந்து
தெவிட்டாத சிவானந்தம் தந்தருளும் பேரின்பமே.

71.
இன்பமே இன்னமுதே இமையோர்க்கும் தலைவியே
இறைவனின் திருநடனம் இனிதாகக் கண்டவளே
அன்பினால் அடியவரின் அகந்தனிலே குடிகொண்டு
அருளாட்சி புரிந்திடும் அம்பலத்து இறைவியே.

72.
இறைவியே ஈசனுடன் இரண்டறவே நிறைந்தவளே
இமைப்பொழுதும் உயிர்களைப் பிரியாமல் காப்பவளே
மறையொலி முழங்குகின்ற மங்கலத்தின் முதற்பொருளே
மனத்தினில் ஒலிக்கின்ற மாசிலாத ஓங்காரமே.

73.
ஓங்காரமே உயிர்களுக்குள் ஒலிக்கின்ற அருட்நாதமே
உலகத்தின் இயக்கமெல்லாம் உன்னருளின் பெருவிளைவே
ஏங்குகின்ற மனத்தினிலே எண்ணங்கள் அடங்கிடவே
இறையுணர்வு மலரச்செய்யும் இணையில்லாத மௌனமே.

74.
மௌனமே மனத்தினுக்கு மெய்ஞ்ஞான வழிகாட்டியே
மனமடங்கும் நிலையினிலே மலர்கின்ற சிவசக்தியே
தானமுடன் தவம்செய்து தரணியில் வாழ்ந்திடுவோர்க்குத்
தவறாமல் கிடைத்திடும் தன்னிகரில்லாச் செல்வமே.

75.
செல்வமே சிவகாமி செம்மையான திருவருளே
சேர்த்துவைத்த பொருளனைத்தும் நிலையற்றதென உணர்த்துபவளே
வெல்லுதற்கரிய ஆணவத்தை வேரறுத்து நீக்கிடவே
வினைபாசம் விலகப்பெறும் வீடுபேற்றின் விடுதலையே.

76.
விடுதலையே வினையறுக்கும் வித்தகத்தின் திருவுருவே
விடியாத பிறவியிருள் விலக்குகின்ற பராசக்தியே
உடலென்னும் நிலையற்ற உறைவிடத்தின் உண்மையினை
உணர்ந்திட அருள்புரியும் உத்தமத்தின் மெய்யுண்மையே.

77.
உண்மையே உலகமெலாம் உணரவேண்டிய மெய்ப்பொருளே
உள்ளத்துள் உறைந்திருக்கும் உமையவளே சிவகாமியே
கண்ணுக்குத் தெரியாத கருணையினை உணர்ந்திடவே
கலங்குகின்ற அடியவர்க்குக் கைகொடுக்கும் நம்பிக்கையே.

78.
நம்பிக்கையே நலமளிக்கும் நாயகியே சிவகாமியே
நள்ளிரவில் நிலவெனவே நலிந்தோர்க்கு ஒளிதருவாய்
அம்பிகையே உன்னருளின் அளவறியத் துணிந்திடாத
அடியேனின் சிந்தையிலே அகன்றுவிரியும் வானமே.

79.
வானமே வளமிகுந்த வையகத்தின் மேலுறையே
வானவர்க்கும் தாயாக வந்தருளும் சிவகாமியே
கானகமும் கழனிகளும் காய்ந்திடாமல் காத்திடவே
கருணையினைப் பொழிந்தருளும் கார்முகிலின் நன்மழையே.

80.
மழையே மண்ணுயிர்க்கு மகிழ்வளிக்கும் அருட்கொடையே
மனிதர்க்கும் பிறவுயிர்க்கும் மாறாத் துணையானவளே
உழைப்பவர் கரங்களிலே உயர்வளிக்கும் தாயவளே
உலகமெல்லாம் அறம் தழைக்க ஊன்றிடும் நல்விதையே.

81.
விதையே விளைவினுக்கு வேராக நிற்பவளே
வினைதீர்க்கும் அருளுக்கு வித்தாக விளங்குபவளே
இதயத்தில் அறியாமை இருளகன்று போயிடவே
இறையறிவை ஏற்றுகின்ற இணையில்லாத திருவிளக்கே.

82.
விளக்கே வினையகற்றும் விண்ணொளியின் திருவுருவே
விளங்குகின்ற சிவஞான வேதத்தின் உட்பொருளே
களங்கமற்ற அன்பினிலே கரைந்திடும் என் சிந்தையுள்ளே
கதிரவனாய் உதித்திடும் கனிவுடைய செம்பொன்னே.

83.
பொன்னே பொன்மலரே பொன்னம்பல நாயகியே
பொய்யகற்றும் மெய்யறிவின் புண்ணியத்தின் திருவுருவே
அன்னமிட்டுக் காக்கின்ற அறவோரின் உள்ளத்திலே
அழியாமல் நிலைத்திடும் அம்பிகையின் புண்ணியமே.

84.
புண்ணியமே புனிதமே பூவுலகின் அருள்நிதியே
புலனடக்கி உன்னைப் போற்றும் புண்ணியரின் துணைவியே
கண்ணுறங்கும் வேளையிலும் கருணையினால் காத்திடுவாய்
கனவிலும் நீங்காத கற்பகத்தின் பாதுகாப்பே.

85.
பாதுகாப்பே பராசக்தி பாவங்களைப் போக்குபவளே
பரிவுடன் பிள்ளைகளைப் பேணுகின்ற பேரன்னையே
தீது செய்யும் எண்ணங்களைத் திருத்துகின்ற நன்னெறியே
தினந்தோறும் அன்புபொழியும் தெய்வத்தின் தாய்மையே.

86.
தாய்மையே தவமெனவே தரணியில் விளங்குபவளே
தனிமையில் துவள்பவர்க்குத் தஞ்சமென நிற்பவளே
நோயுற்று நொந்தவரின் நெஞ்சினிலே நம்பிக்கை தந்து
நொடியினிலும் துணைநிற்கும் நித்தியமான ஆறுதலே.

87.
ஆறுதலே அருமருந்தே அம்பிகையே சிவகாமியே
ஆழ்ந்ததுயர் அகன்றிடவே அன்பளிக்கும் திருத்தாயே
ஊறுகின்ற கண்ணீரை உன்கருணை துடைத்திடவே
உள்ளமெலாம் இனித்திடும் உயர்ந்த அருளின் ஊற்றே.

88.
ஊற்றே உயிர்க்கெல்லாம் உணர்வளிக்கும் பேரருளே
ஊழ்வினையின் பயனறிந்து உயர்நெறியில் நடத்துபவளே
காற்றாலும் மழையாலும் கலங்கிடும் வாழ்வினிலே
கைவிடாத் துணிவளிக்கும் கருணையின் நல்வெற்றியே.

89.
வெற்றியே வினைமாற்றும் வேதத்தின் திருப்பொருளே
வென்றிடும் பகையினிலும் வெறுப்பின்றி வாழ்த்துபவளே
பற்றினால் விளைகின்ற பிணைப்புகளை நீக்கிடவே
பரமனருள் உணர்ந்திடும் பக்குவத்தின் பெருநிறைவே.

90.
நிறைவே நித்தியத்தின் நிமலமான திருவுருவே
நினைத்திடும் அடியவரின் நெஞ்சமெலாம் நிறைந்தவளே
குறையெலாம் களைந்திடவே குளிர்ந்தருளைப் பொழிந்திடுவாய்
குழப்பமற்ற மனத்தினுக்கு குணமளிக்கும் அமைதியே.

91.
அமைதியே அருளமுதே அகிலத்தின் ஆதாரமே
அசைவுள்ள உயிர்க்கெல்லாம் அன்பருளும் சிவசக்தியே
இமையவர் அறியாத இறைநிலையை உணர்த்திடவே
இறைவனுடன் இணைந்திருக்கும் இணையில்லாத ஆதியே.

92.
ஆதியே அந்தமிலா அருட்சக்தி சிவகாமியே
ஆக்கமும் அழிவுமெல்லாம் அறிந்துநிற்கும் பரம்பொருளே
வேதமும் ஆகமமும் விளக்கிடும் மெய்ஞ்ஞானமே
விளைவெல்லாம் கடந்துநிற்கும் விகற்பமில்லா அந்தமே.

93.
அந்தமே இல்லாத அருள்வடிவே அகிலாண்டேஸ்வரியே
அறிவுக்கும் அறிவாகி அன்பினுக்கு உயிரானவளே
சிந்தையில் எழுகின்ற சித்தவிகாரங்கள் ஒழிந்திடவே
சிவத்துடன் ஒன்றிடும் சிவஞானத்தின் இறுதியே.

94.
இறுதியே முதலாகும் இறைவனது பேரருளே
இறவாத மெய்ப்பொருளாய் எங்கணுமே நிறைந்தவளே
அறிவொளியில் எழுந்திடும் ஆனந்தத் திருநடனம்
அகிலமும் காணுகின்ற அம்பலத்தின் திருவரங்கே.

95.
அரங்கே திருச்சிற்றம்பலம் அருள்நடனத் திருக்கோயிலே
அண்டமெலாம் ஆளுகின்ற ஆனந்தக் கூத்தனிடமே
கரங்கள் கூப்பித் தொழுகின்ற கணக்கற்ற அடியவர்க்குக்
கருணைமழை பொழிந்திடும் கனகசபையின் அரசியே.

96.
அரசியே அருளரசியே அம்பலத்து நாயகியே
அமலனாம் சிவபெருமான் அருகமர்ந்த சிவகாமியே
பரிவுடன் பணிந்திடும் பக்தர்களின் உள்ளத்திலே
பாலமுதாய் இனித்திடும் பராசக்தி அமுதவல்லியே.

97.
அமுதவல்லியே ஆனந்தவல்லியே அகிலத்தின் பேரன்னையே
அறியாமல் செய்தபிழை அனைத்தையும் பொறுப்பவளே
சமயநெறி தவறாமல் சத்தியத்தில் நிலைத்திடவே
சங்கரனின் திருப்பாகம் தாங்குகின்ற அருட்கனிவே.

98.
கனிவே கருணையே கற்பகத்தின் திருக்கொடியே
காலங்கள் கடந்துநிற்கும் கயிலாய நாயகியே
மனிதர்க்கும் பிறவுயிர்க்கும் மறவாத் துணையாகி
மகத்துவமாய் விளங்குகின்ற மங்கலத்தின் கடவுளே.

99.
கடவுளே கருணைக்கடலே கண்ணுதலான் நாயகியே
கண்ணுக்குப் புலப்படாத காரணத்தின் காரணியே
அடிமுடி அறியாத அண்ணலுடன் இணைந்துநின்று
அகிலத்தை ஒளிர்விக்கும் அழிவில்லாத பேரொளியே.

100.
பேரொளியே பிழையகற்றும் பெருந்தாயே சிவகாமியே
பேரன்பால் உனது அந்தாதி நூறையும் செப்பிடுவோர்
ஆருயிர்க்கும் அன்புசெய்து அறநெறியில் நிலைத்திடவே
அருள்வழி காட்டிடுவான் உன்னுடன் ஒன்றிய பரமசிவன்.

திருச்சிற்றம்பலம்!
ஓம் சிவகாமி அம்பிகையே போற்றி!

சைவ சனாதன சேவை மையம்
https://saivasanatanam.com/saiva-works/sivakami-anthathi