தமிழ்நாட்டில் மகளிருக்கான கட்டணமில்லா அரசுப் பேருந்துப் பயணத்தை மேலும் விரிவுபடுத்தும் ‘வெற்றிப் பயணம்’ திட்டம் இன்று, 2026ஆம் ஆண்டு அக்டோபர் மாதம் 2ஆம் திகதி முதல் நடைமுறைக்கு வருகிறது.

தமிழ்நாடு முதலமைச்சர் ச. ஜோசப் விஜய் சென்னை கோயம்பேட்டில் இன்று இந்தத் திட்டத்தைத் தொடங்கி வைக்கவுள்ளார். இதனைத் தொடர்ந்து தமிழ்நாடு முழுவதும் தேர்ந்தெடுக்கப்பட்ட அரசுப் பேருந்துகளில் விரிவுபடுத்தப்பட்ட கட்டணமில்லாப் பயண வசதி நடைமுறைக்கு வருகிறது.

தமிழ்நாட்டின் ஏழு அரசு போக்குவரத்துக் கழகங்களால் இயக்கப்படும் 18,413 திட்டமிடப்பட்ட பேருந்துகளில் 12,692 பேருந்துகள் ‘வெற்றிப் பயணம்’ திட்டத்தின் கீழ் கொண்டுவரப்படுகின்றன. இது மொத்த திட்டமிடப்பட்ட அரசுப் பேருந்துகளில் சுமார் 69 விழுக்காடாகும்.

இந்தப் பேருந்துகள் மூலம் நாளொன்றுக்கு மேற்கொள்ளப்படும் 1,94,649 பயண நடைகளில் 1,65,312 நடைகள் திட்டத்தின் கீழ் இடம்பெறும் என தமிழக அரசு தெரிவித்துள்ளது. இதன் மூலம் நாளொன்றுக்கு சுமார் 84.32 இலட்சம் மகளிர் பயன்பெறுவார்கள் என அரசு மதிப்பிட்டுள்ளது.

ஏற்கனவே நகர சாதாரண அரசுப் பேருந்துகள் மற்றும் குறிப்பிட்ட மலைப்பகுதி சாதாரணப் பேருந்துகளில் நடைமுறையில் இருந்த மகளிருக்கான கட்டணமில்லாப் பயண வசதி, ‘வெற்றிப் பயணம்’ திட்டத்தின் மூலம் மேலும் பல வகையான அரசுப் பேருந்துகளுக்கு விரிவுபடுத்தப்படுகிறது.

மாணவிகள் கல்வி நிலையங்களுக்குச் செல்வது, மகளிர் பணியிடங்களுக்குப் பயணிப்பது, மருத்துவம் மற்றும் அத்தியாவசியத் தேவைகளுக்காகப் பயணம் செய்வது போன்றவற்றில் போக்குவரத்துச் செலவைக் குறைப்பதே திட்டத்தின் முக்கிய நோக்கங்களில் ஒன்றாக தமிழக அரசு தெரிவித்துள்ளது.

மகாத்மா காந்தியின் பிறந்த நாளான அக்டோபர் 2ஆம் திகதியை முன்னிட்டு இந்தத் திட்டத்தை நடைமுறைக்குக் கொண்டுவருவதாக தமிழக அரசு ஏற்கனவே அறிவித்திருந்தது.