தமிழ் மொழியையும் நவீன தொழில்நுட்பத்தையும் ஒருங்கிணைக்கும் நோக்கில், சென்னையில் உள்ள செம்மொழித் தமிழாய்வு மத்திய நிறுவனத்தில் 24 மணிநேரத் தொழில்நுட்பப் போட்டி செப்டம்பர் 23ஆம் திகதி ஆரம்பிக்கப்பட்டுள்ளது.

தென்னிந்தியாவின் பல்வேறு கல்லூரிகளைச் சேர்ந்த மாணவர்கள் பங்கேற்கும் இப்போட்டிக்கு ஆயிரத்திற்கும் மேற்பட்ட பதிவுகள் கிடைத்துள்ளன. அவற்றிலிருந்து 60 அணிகள் இறுதிச் சுற்றுக்குத் தேர்ந்தெடுக்கப்பட்டுள்ளன.

தமிழ் நூல்களையும் ஓலைச்சுவடிகளையும் மின்னாக்கம் செய்தல், தமிழ் மொழியைக் கற்பதற்கான இணையத்தளங்களை உருவாக்குதல், செயற்கை நுண்ணறிவு மூலம் தமிழில் தகவல்களை அணுகுதல் உள்ளிட்ட ஆறு தொழில்நுட்பப் பிரிவுகளில் மாணவர்கள் தங்கள் கண்டுபிடிப்புகளை உருவாக்கவுள்ளனர்.

தமிழ் மொழியின் கற்றல், ஆய்வு மற்றும் மின்னணுப் பாதுகாப்பிற்கான நடைமுறைத் தொழில்நுட்பங்களை உருவாக்குவது இந்நிகழ்வின் பிரதான நோக்கமாகும்.

இத்தகைய தொழில்நுட்ப முயற்சிகள் தமிழ் மொழியின் பயன்பாட்டை நவீன மின்னணுத் தளங்களில் விரிவுபடுத்துவதற்கான புதிய வாய்ப்புகளை உருவாக்குகின்றன.