கனடாவின் ஒன்ராறியோ மாகாணத்தில் 2026ஆம் ஆண்டுக்கான நகராட்சி மற்றும் பாடசாலை வாரியத் தேர்தல்கள் எதிர்வரும் அக்டோபர் மாதம் 26ஆம் திகதி திங்கட்கிழமை நடைபெறுகின்றன.

ஒன்ராறியோவில் நடைபெறும் நகராட்சி தேர்தல் என்பது மாகாண சட்டமன்றத் தேர்தல் அல்லது கனடிய கூட்டாட்சி நாடாளுமன்றத் தேர்தலைப் போன்ற கட்சி அடிப்படையிலான தேர்தல் அல்ல.

நகர முதல்வர், நகரசபை உறுப்பினர், பிராந்திய சபை உறுப்பினர் மற்றும் பாடசாலை வாரிய அறங்காவலர் உள்ளிட்ட பதவிகளுக்கு வேட்பாளர்கள் தனிநபர்களாகவே போட்டியிடுகின்றனர்.

எனவே லிபரல், கன்சர்வேட்டிவ், புதிய ஜனநாயகக் கட்சி போன்ற அரசியல் கட்சிகளின் பெயர்கள் நகராட்சி வாக்குச்சீட்டில் வேட்பாளர்களுடன் இணைக்கப்படுவதில்லை.

ஒன்ராறியோ முழுவதும் அக்டோபர் 26ஆம் திகதி பிரதான தேர்தல் நாளாக இருந்தாலும், முன்கூட்டிய வாக்களிப்பு மற்றும் இணையவழி வாக்களிப்பு உள்ளிட்ட மாற்று வாக்களிப்பு முறைகள் தொடர்பான ஏற்பாடுகளையும் கால அட்டவணைகளையும் ஒவ்வொரு நகராட்சியும் தனித்தனியாக நிர்ணயிக்கின்றன.

இந்தத் தேர்தல்களில் போட்டியிடும் வேட்பாளர்களில் தமிழ் சமூகத்துடன் உறுதிப்படுத்தப்பட்ட தொடர்புடையவர்களும், பெயர் மற்றும் பிற பொதுவில் கிடைக்கும் தகவல்களின் அடிப்படையில் தமிழ் பின்னணி இருக்கக்கூடியவர்களும் இடம்பெற்றுள்ளனர்.

இதுவரை அடையாளம் காணப்பட்டு, அதிகாரப்பூர்வ வேட்பாளர் பட்டியலில் உறுதிப்படுத்தப்பட்ட 22 பேரில் 14 பேர் ஆண்களாகவும் 8 பேர் பெண்களாகவும் இருக்கின்றனர்.

யோர்க் பிராந்தியத்தின் மார்க்கம் நகரசபைத் தேர்தலில், வட்டாரம் 5இல் தமிரா ரஜிகரனும், வட்டாரம் 7இல் கிளி செல்லையாவும் நகரசபை உறுப்பினர் பதவிக்குப் போட்டியிடுகின்றனர்.

அதே மார்க்கம் வட்டாரங்கள் 5 மற்றும் 7க்கான யோர்க் பிராந்திய மாவட்ட பாடசாலை வாரிய அறங்காவலர் பதவிக்கு ருக்‌ஷன் பரா, கரிஷன் ரவிசங்கர் மற்றும் ஹேமமாலினி வெங்கடராமன் ஆகியோர் களமிறங்கியுள்ளனர்.

இதன்படி மார்க்கம் பகுதியில் இந்தத் தொகுப்பில் இடம்பெறும் வேட்பாளர்களின் எண்ணிக்கை ஐந்தாகும்.

டர்ஹாம் பிராந்தியத்தின் பிக்கரிங் நகராட்சியில், வட்டாரம் 3 நகரசபை உறுப்பினர் பதவிக்கு ராஜ்குமார் நாடா போட்டியிடுகின்றார்.

வட்டாரம் 1 நகரசபை உறுப்பினர் பதவிக்கு பிரியா வடிவேல் போட்டியிடுகின்றார்.

பிக்கரிங் பகுதிக்கான டர்ஹாம் மாவட்ட பாடசாலை வாரிய அறங்காவலர் பதவிக்கு சிந்துஜா கனகேஸ்வரன் களமிறங்கியுள்ளார்.

இதன்படி பிக்கரிங் பகுதியில் இந்தத் தொகுப்பில் இடம்பெறும் இறுதி வேட்பாளர்களின் எண்ணிக்கை மூன்றாகும்.

இதே, டர்ஹாம் பிராந்தியத்தின் அஜாக்ஸ் பகுதியில், வட்டாரம் 2 பிராந்திய சபை உறுப்பினர் பதவிக்கு ரஞ்சித் பரணிவாசகமும், டர்ஹாம் மாவட்ட பாடசாலை வாரிய அறங்காவலர் பதவிக்கு மயூரி முருகதாசனும் போட்டியிடுகின்றனர்.

டொரண்டோ நகரத்தில் இந்தத் தொகுப்பில் இடம்பெற்றுள்ள பன்னிரண்டு பேரும் நகரசபை உறுப்பினர் பதவிகளுக்குப் போட்டியிடுகின்றனர்.

வட்டாரம் 17 – டொன் வெலி வடக்கு பகுதியில் ரோய் சமாதானம் போட்டியிடுகின்றார்.

வட்டாரம் 20 – ஸ்கார்பரோ தென்மேற்கு பகுதியில் தற்போதைய நகரசபை உறுப்பினரான பார்த்தி கந்தவேல் மீண்டும் போட்டியிடுகின்றார்.

வட்டாரம் 21 – ஸ்கார்பரோ சென்டர் பகுதியில் நகரசபை உறுப்பினர் பதவிக்குப் போட்டியிடும் 11 வேட்பாளர்களில் மதுரா சண்முகரத்தினம் மற்றும் கிரிசன் வீரசிங்கம் ஆகிய இருவரும் இந்தத் தொகுப்பில் இடம்பெறுகின்றனர்.

வட்டாரம் 22 – ஸ்கார்பரோ–அஜின்கோர்ட் பகுதியில் சிந்தியா விஜயராஜன் நகரசபை உறுப்பினர் பதவிக்குப் போட்டியிடுகின்றார்.

வட்டாரம் 23 – ஸ்கார்பரோ வடக்கு பகுதியில் பிரபீனா சத்திய நாதன் நகரசபை உறுப்பினர் பதவிக்குப் போட்டியிடுகின்றார்.

வட்டாரம் 24 – ஸ்கார்பரோ–கில்ட்வுட் பகுதியில் நாச்சி ராமசாமி மற்றும் அருண் சிவானந்தன் ஆகியோர் போட்டியிடுகின்றனர்.

வட்டாரம் 25 – ஸ்கார்பரோ–ரூஜ் பார்க் பகுதியில் டர்ஷன் காசிநாதன், சோமஸ் கணேசபிள்ளை, கண்ணன் ஸ்ரீ ஜூனியர் மற்றும் தற்போதைய நகரசபை உறுப்பினரான நீதன் சண் ஆகியோர் போட்டியிடுகின்றனர்.

இதன்படி டொரண்டோவில் இந்தத் தொகுப்பில் இடம்பெற்றுள்ள வேட்பாளர்களின் எண்ணிக்கை பன்னிரண்டாகும்.

மொத்தமாகப் பார்க்கும்போது மார்க்கம் பகுதியில் 5 பேர், பிக்கரிங் பகுதியில் 3 பேர், அஜாக்ஸ் பகுதியில் 2 பேர் மற்றும் டொரண்டோவில் 12 பேர் என நான்கு நகராட்சி பகுதிகளில் மொத்தம் 22 பேர் தற்போது இறுதிப் போட்டியில் இடம்பெற்றுள்ளனர்.

இவர்கள் மார்க்கம் நகரசபை, பிக்கரிங் நகரசபை, டொரண்டோ நகரசபை, யோர்க் பிராந்திய மாவட்ட பாடசாலை வாரியம் மற்றும் டர்ஹாம் மாவட்ட பாடசாலை வாரியம் என மொத்தம் ஐந்து உள்ளூராட்சி மற்றும் கல்விச் சபை அமைப்புகளுக்கான தேர்தல் போட்டிகளில் இடம்பெறுகின்றனர்.

இந்தப் பட்டியலில் சிலர் முதல் முறையாக தற்போதைய பதவிகளுக்கான தேர்தல் களத்திற்கு வருகின்ற நிலையில், சிலர் ஏற்கனவே தேர்தல்களைச் சந்தித்த அனுபவத்துடன் மீண்டும் களமிறங்குகின்றனர்.

மார்க்கம் வட்டாரம் 7இல் போட்டியிடும் கிளி செல்லையா, 2025ஆம் ஆண்டு நடைபெற்ற அதே வட்டாரத்திற்கான இடைத்தேர்தலிலும் போட்டியிட்டிருந்தார். தற்போது 2026 பொதுத் தேர்தலில் மீண்டும் அதே வட்டாரத்தில் போட்டியிடுகின்றார்.

யோர்க் பிராந்திய மாவட்ட பாடசாலை வாரிய அறங்காவலர் பதவிக்கு போட்டியிடும் ருக்‌ஷன் பரா, 2022ஆம் ஆண்டு நடைபெற்ற பாடசாலை வாரியத் தேர்தலிலும் போட்டியிட்டிருந்தவர். 2026 தேர்தலில் அவர் மீண்டும் பாடசாலை வாரிய அறங்காவலர் பதவிக்குக் களமிறங்கியுள்ளார்.

டொரண்டோ வட்டாரம் 20இல் போட்டியிடும் பார்த்தி கந்தவேல், 2022 நகராட்சி தேர்தலிலும் அதே வட்டாரத்தில் போட்டியிட்டிருந்தார். பின்னர் 2023ஆம் ஆண்டு நடைபெற்ற இடைத்தேர்தலில் வெற்றி பெற்று டொரண்டோ நகரசபை உறுப்பினரானார். தற்போது பதவியில் உள்ள அவர் 2026 தேர்தலில் மீண்டும் போட்டியிடுகின்றார்.

டொரண்டோ வட்டாரம் 25இல் போட்டியிடும் நீதன் சண், 2025ஆம் ஆண்டு நடைபெற்ற ஸ்கார்பரோ–ரூஜ் பார்க் இடைத்தேர்தலில் வெற்றி பெற்று நகரசபை உறுப்பினரானார். தற்போதைய நகரசபை உறுப்பினரான அவர் 2026 தேர்தலில் மீண்டும் அதே வட்டாரத்தில் களமிறங்கியுள்ளார்.

இதன்படி இந்தத் தொகுப்பில் இடம்பெற்றுள்ள 22 இறுதிப் போட்டியாளர்களில் கிளி செல்லையா, ருக்‌ஷன் பரா, பார்த்தி கந்தவேல், மற்றும் நீதன் சண், ஆகிய நால்வரும் முந்தைய நகராட்சி அல்லது பாடசாலை வாரியத் தேர்தல்களைச் சந்தித்த பின்னர் மீண்டும் தேர்தல் களத்திற்கு வருபவர்களாக அடையாளம் காணப்படுகின்றனர்.

ஒன்ராறியோவின் 2026 நகராட்சி தேர்தல் களம் இவ்வாறு நகரசபை பிரதிநிதித்துவம் மட்டுமன்றி, பாடசாலை வாரிய பிரதிநிதித்துவத்திலும் தமிழ் சமூகத்துடன் தொடர்புடைய பலர் களமிறங்கும் தேர்தலாக அமைந்துள்ளது.

இறுதி முடிவை ஒன்ராறியோ வாக்காளர்கள் அக்டோபர் 26ஆம் திகதி தங்களது வாக்குகள் மூலம் தீர்மானிக்கவுள்ளனர்.