Alberta – செப்டம்பர் 28, 2026

கனடாவின் Alberta மாகாணத்தில் அக்டோபர் 19, 2026 அன்று மாகாண அளவிலான வாக்கெடுப்பு நடைபெறவுள்ளது. இதில் மொத்தம் பத்து கேள்விகளுக்கு Alberta வாக்காளர்கள் பதிலளிக்க உள்ளனர்.

முதலில் Alberta அரசு ஒன்பது கேள்விகளை முன்வைத்திருந்தது. அவற்றில் ஐந்து கேள்விகள் குடியேற்றக் கொள்கை மற்றும் மாகாணச் சேவைகளுக்கான தகுதி விதிகள் தொடர்பானவை.

குடியேற்றத்தின் மீதான மாகாண அதிகாரத்தை அதிகரிப்பது, நிரந்தரமற்ற குடியேற்ற அந்தஸ்துடையோர் சில மாகாண சமூக உதவிகளைப் பெறுவதற்கான குறைந்தபட்ச வசிப்புக் காலம், சுகாதாரம் மற்றும் கல்விச் சேவைகளுக்கான கட்டணங்கள், மாகாணத் தேர்தலில் வாக்களிக்க குடியுரிமைச் சான்று கோருவது போன்ற விடயங்கள் அவற்றில் இடம்பெறுகின்றன.

மேலும் நான்கு கேள்விகள் கனடிய அரசியலமைப்பு மற்றும் மத்திய–மாகாண அதிகாரப் பகிர்வு தொடர்பானவை.

Albertaவின் Court of King’s Bench மற்றும் மேல்முறையீட்டு நீதிமன்ற நீதிபதிகளை மத்திய அரசுக்குப் பதிலாக மாகாண அரசுகள் தேர்ந்தெடுப்பது, தேர்ந்தெடுக்கப்படாத கூட்டாட்சி Senate அமைப்பை நீக்குவது, மாகாண அதிகார வரம்பில் உள்ள மத்திய திட்டங்களிலிருந்து நிதியை இழக்காமல் விலகுவது, மத்திய–மாகாணச் சட்ட அதிகார மோதலில் மாகாணச் சட்டத்திற்கு முன்னுரிமை வழங்குவது போன்ற முன்மொழிவுகள் அவற்றில் உள்ளன.

பின்னர் Alberta Premier Danielle Smith மே 21ஆம் திகதி பத்தாவது கேள்வியை வாக்கெடுப்பில் சேர்ப்பதாக அறிவித்தார்.

அந்தக் கேள்வி, Alberta கனடாவின் மாகாணமாகத் தொடர வேண்டுமா அல்லது கனடாவிலிருந்து பிரிவது தொடர்பாக எதிர்காலத்தில் கட்டாய வாக்கெடுப்பு நடத்தத் தேவையான அரசியலமைப்புச் சட்ட நடைமுறையை Alberta அரசு தொடங்க வேண்டுமா என்பதைக் குறித்து வாக்காளர்களின் கருத்தைக் கேட்கிறது.

அக்டோபர் 19 வாக்கெடுப்பே Alberta கனடாவிலிருந்து பிரிய வேண்டுமா என்பதைத் தீர்மானிக்கும் கட்டாய வாக்கெடுப்பு அல்ல. இரண்டாவது வழியை வாக்காளர்கள் தேர்ந்தெடுத்தால், பின்னர் அத்தகைய வாக்கெடுப்புக்கான சட்ட நடைமுறையைத் தொடங்குவது பற்றிய முடிவாகவே அது அமையும்.

இதன் மூலம் அக்டோபர் 19ஆம் திகதி வாக்காளர்களுக்கு மொத்தம் பத்து கேள்விகள் முன்வைக்கப்படுகின்றன. Elections Alberta வாக்களிப்பு இடங்கள், முன்கூட்டிய வாக்களிப்பு மற்றும் தபால் வழி special ballot குறித்த தகவல்களை வெளியிட்டு வருகிறது.

ஆதாரங்கள்: Alberta அரசின் பிப்ரவரி 19 மற்றும் மே 21, 2026 அறிவிப்புகள்; Elections Alberta வாக்கெடுப்புத் தகவல்.